Përmes një publikimi të ri të bërë në profilin zyrtar të e-Albania në rrjetin social Instagram, është njoftuar se mënyra e verifikimit në portal sapo ka ndryshuar.
Tashmë të gjithë përdoruesit që do të regjistrohen në e-Albania si qytetar apo si biznes nuk do të përdorin një fjalëkalim të përcaktuar si më parë, por do të pajisen me një kod 6-shifror të ri i cili përdoret vetëm një herë dhe do të dërgohet në numrin tuaj celular, të cilin e keni të regjistruar në portal. Për të mundësuar aksesimin në platformë, kodi një përdorimësh 6 shifror do të dërgohet dhe në adresën tuaj të email-it.
Nëse numri juaj i telefonit me të cilin jeni regjistruar në e-Albania është i huaj, atëherë mesazhi me kodin 6-shifror nuk do të vijë në celular, por vetëm në email. Platforma bën thirrje për të gjithë qytetarët që të përditësojnë numrat e tyre të telefonit, nëse nuk e kanë përditësuar atë ende.
Si të përditësoj të dhënat në llogarinë time në e-Albania?
Për të përditësuar të dhënat tuaja në e-Albania, ju duhet të veproni si më poshtë:
- Shkoni në rubrikën Hapësira ime
- Gjeni kategorinë “Ndrysho të dhënat e llogarisë”
- Përditësoni të dhënat që dëshironi
Nuk mund të identifikohem në portal pasi e kam ndërruar numrin e telefonit. Çfarë të bëj?
Nëse ju përdoni tashmë një numër të ndryshëm nga ai me të cilin jeni regjistruar në portal apo dhe adresën e email-it, kontaktoni me [email protected], dhe mos harroni të shkruani në subjektin e email-it “Ndihmë për aksesimin e llogarisë” në mënyrë që email-i juaj të ketë prioritet.
