Në datën 3 janar, presidenti i Bjellorusisë Alyaksandr Lukashenka firmosi një ligj të ri i cili bën të ligjshëm piratimin e përmbajtjeve të cilat vijnë nga vendet që kanë vendosur sanksione kundër këtij shteti gjatë viteve të fundit, kryesisht pas mbështetjes së Rusisë në luftën kundër Ukrainës.
Në teori, njerëzit apo organizatat që përdorin përmbajtje të shkarkuara ilegalisht do të duhet të paguajnë, por pagesat do të shkojnë në adresat bankare të drejtuara nga autoriteti i patentimit Bjellorus. Më pas mbajtësit e të drejtave të software-ve që janë shkarkuar ilegalisht kanë të drejtën të bëjnë një kërkesë brenda 3 vitesh për t’u shpërblyer nga shteti.
Nëse mbajtësit e të drejtave të software-ve vonohen më tepër se 3 vite, atëherë fitimet do t’i mbeten shtetit.
Mirëpo dhe në rastin “fantastik” ku çdo përdorues do të raportojë përdorimin e software-ve apo filmave të piratuara drejt qeverisë dhe qeveria do të dëmshpërblejë mbajtësit e të drejtave për këto software, shuma që do të paguhet do të vendoset nga Këshilli i Ministrave të Bjellorusisë. Kryesisht mendohet se produktet më të piratuara do të jenë ato të Microsoft dhe Adobe.
Ligji tregon se autoriteti i patentimeve mund të mbajë jo më tepër se 20% të vlerës që do të dëmshpërblejë krijuesit.
Gjithahtu në këtë ligj tregohet se është e ligjshme që në Bjellorusi të importohen produkte të nevojshme pavarësisht nëse ekziston apo jo leja nga mbajtësit e të drejtave të produktit.
