Apple planifikon të shtojë monitorimin e presionit të gjakut dhe zbulimin e apnesë së gjumit në Apple Watch të reja me një dizajn të përditësuar në vitin 2024, sipas Mark Gurman të Bloomberg.
Në një raport që tregon ambiciet e lidhura me shëndetin e Apple, Gurman përshkruan teknologjinë e sensorëve të presionit të gjakut të kompanisë që do të vijë vitin e ardhshëm, duke bërë të mundur zbulimin e niveleve të larta të presionit të gjakut të përdoruesve, por jo duke treguar shifrat e sakta.
Një version i ardhshëm i sistemit në zhvillim mund të sigurojë numra të saktë dhe madje të diagnostikojë dhe problemet e mundshme, sipas Gurman. Megjithatë, këto përmirësime “mbeten larg“, shton ai.
Gjithashtu në 2024 do të prezantohet një shërbim për zbulimin e apnesë së gjumit të bazuar në Apple Watch. Sipas raportit, ai do të grumbullojë të dhëna rreth gjumit dhe frymëmarrjes së përdoruesve për të vlerësuar nëse dikush vuan nga apnea e gjumit, dhe më pas do t’i këshillojë përdoruesit që të vizitohen nga një mjek.
Siç është raportuar më parë, Apple po punon gjithashtu për monitorimin jo-invaziv të glukozës në gjak. Sistemi i Apple thuhet se përdor një çip fotonik silikoni për të lëshuar dritë nga një lazer nën lëkurë dhe për të përcaktuar përqendrimin e glukozës në gjak. Monitorimi i glukozës është projektuar në një mënyrë të ngjashme me sistemin e presionit të gjakut, në atë që aktualisht monitoron se si është trendi i sheqerit në gjak të një personi dhe paralajmëron përdoruesit para-diabetik, në vend që të ofrojë një lexim me shifra të sakta të sheqerit në gjak.
Megjithatë, përpjekjet e Apple për monitorimin e glukozës në gjak nuk kanë gjasa të shfaqen në një produkt për “të paktën disa vite“, sipas raportit të fundit të Gurman, duke cituar njerëz me njohuri në kompani.
