Vërtetë që përdoruesit janë ankuar vazhdimisht për tastierat e MacBook-ëve, por kjo do e çojë në një nivel krejt tjetër.
Patenta më e fundit e regjistruar nga Apple tek US Patent and Trademark tregon se kompania po planifikon që secili buton i tastierës të ketë një ekran të vogël. Mundësitë e shfrytëzimit të këtij koncepti janë të pafundme. Jo vetëm që secili buton do të shfaqë shkronjën e cila mund të ndryshohet sipas gjuhës së përdorur por edhe në programe të ndryshme si Photoshop etj mund të shfaqet funksioni që një buton i veçantë bën.
Butonat vetë do të kenë një ekran OLED, elektroforetik ose ndonjë tjetër të përshtatshëm për një funksion të të tilla përmasave. Materialet mund të jenë qeramike, xhami, safiri ose metali.
Ideja është shumë herë më e mirë sesa zëvendësimi i të gjithë tastierës me një ekran me prekje, pasi në këtë mënyrë nuk do të eliminohej reagimi i pavarur i secilit buton, aq i nevojshëm për këdo që shkruan. Nga ana tjetër kjo do ia rriste goxha koston, sikur të mos mjaftonin çmimet e momentit.
Si gjithmonë, regjistrimi i një patente nuk do të thotë detyrimisht zbatim i saj.
