Tashmë sapo janë publikuar pamjet e reja të një roboti tavoline që Apple po zhvillon për shtëpinë inteligjente, i cili u bë i ditur përmes një postimi në blog të publikuar në faqen Machine Learning Research të Apple.
Postimi përmbledh një punim nga një ekip studiuesish në Apple që zhvilloi një robot me lëvizje ekspresive, dhe një robot i tillë është shumë më tërheqës se një robot standard. Videoja tregon një studiues që kryen detyra me dy robotë, njëri i emërtuar “Ekspresiv” dhe tjetri “Funksional”, dhe i pari është shumë më argëtues.
Të dy robotët janë llamba tavoline të instaluara në një krah lëvizës, që përfshin një dritë LED, kamerë, altoparlant dhe projektor të integruar. Ata u përgjigjen gjesteve dhe komandave zanore dhe kanë një zë që tingëllon si Siri i Apple. Njëra prej tyre shfaq shumë personalitet. Kur studiuesja në video luan muzikë, llamba robot “Ekspresiv” kërcen me të; kur ajo pyet për motin, roboti i tregon të hedhë një sy jashtë; kur ajo është duke punuar në një projekt të ndërlikuar, ai ndjek lëvizjet e saj për të hedhur dritë në mënyrë më të dobishme; kur i kujton të pijë ujë, e shtyn gotën drejt saj.
Versioni Funksional – i paraqitur krah për krah duke bërë të njëjtat detyra – mbetet i palëvizshëm nëse nuk kërkohet të lëvizë si pjesë e detyrës. Është një demonstrim jashtëzakonisht efektiv se si shtimi i karakteristikave njerëzore në një objekt mund ta bëjë atë më efektiv dhe akoma më funksional.
Raporte të shumta kanë treguar se Apple po zhvillon më shumë pajisje për shtëpinë – duke përfshirë një ekran inteligjent dhe një robot tavoline. Këto mund të veprojnë si një asistent personal me Siri, një pajisje video-telefonate FaceTime dhe një qendër kontrolli inteligjente të shtëpisë.
Mark Gurman i Bloomberg ka raportuar se pajisja robotike mund të vijë në treg në vitin 2026 ose 2027 dhe mund të kushtojë rreth $1000.
