Apple ka bërë një përmirësim të ndjeshëm të teknologjisë që do të bëjë të mundur matjen e glukozës në gjak në mënyrë jo-invazive nga Apple Watch, siç tregon dhe Mark Gurman në Bloomberg.
Apple dëshiron të shtojë këtë shërbim në gjeneratat e ardhshme të orave smart në mënyrë që personat diabetikë të kontrollojnë vazhdimisht nivelin e glukozës në gjak pa patur nevojë për të shpuar gishtin e tyre.
Për të gjetur saktësisht nivelin e glukozës në gjak, Apple po zhvillon një proçesor të ri që përdor spektroskopinë optike të absorbimit nëpërmjet ndriçimit të rrezeve infra të kuqe nën lëkurë. Momentalisht kjo teknologji nuk është e përshtatur për Apple Watch, pasi pajisja e nevojshme për matjen e glukozës në gjak të zhvilluar nga kompania ka madhësinë e një iPhone-i dhe mund të vendoset në krahun e personit.
TSMC ka zhvilluar proçesorin kryesor që fuqizon këtë prototip, megjithatë Apple ka punuar më parë me Rockley Photonics në krijimin e sensorëve dhe proçesorëve për monitorimin e nivelit të glukozës në gjak. Në vitin 2021 Rockley Photonics prezantoi një sistem dixhital sensorësh që mund të monitoronin temperaturën e trupit, tensionin arterial, hidratimin, alkoolin, trendet e glukozës dhe shumë të tjera.
Puna e Apple për krijimin e një mënyre alternative të monitorimit të nivelit të glukozës në gjak ka nisur që në 2010 pas blerjes së kompanisë RareLight falë këshillave të Steve Jobs.
