Raportimet më të reja nga analisti i njohur Mark Gurman tregojnë se Apple po përgatit ekranet e saja për t’i përdorur në produktet kryesore. Apple Watch mund të jetë produkti i parë i Apple që do të përdorë ekranet e kompanisë duke filluar nga viti 2024, dhe pas tyre ekranet do të përdoren në iPhone.
“Kompania ka si qëllim të nisë përdorimin e ekraneve të reja në Apple Watch Ultra duke filluar nga viti i ardhshëm. Ekranet do të përdorin tashmë një teknologji të përmirësuar microLED. Më vonë këto ekrane do të vijnë dhe drejt produkteve të tjera të Apple, duke përfshirë këtu dhe iPhone.” tregoi Mark Gurman.
Në krahasim me Apple Watch aktuale, gjenerata e re e ekraneve është dizenjuar për të ofruar më tepër ndriçim, ngjyra më të gjalla si dhe mundësinë e shikimit më të mirë nga kënde të ndryshme. “Njerëzit që e kanë parë prototipin e ekranit të ri tregojnë se gjërat do të duken sikur janë pikturuar mbi xham,” shton Gurman në raportimin e tij.
Aktualisht Apple përdor ekranet e prodhuara nga konkurentët si LG dhe Samsung në disa prej produkteve të tyre, por kompania dëshiron të ketë më tepër kontroll në hardware. Kjo gjë bëri që Apple të nxiste tranzicionin nga proçesorët Intel në Apple Silicon përgjatë dy viteve të fundit.
Raportimet më të reja tregojnë gjithashtu se Apple ka në plan të përfshijë për herë të parë në laptopët MacBook Pro ekranet me prekje, mirëpo një gjë e tillë pritet të ndodhë në vitin 2025.
