Apple pritet të prezantojë disa përditësime të rëndësishme për AirPods gjatë konferencës WWDC 2025, që nis më 9 qershor. Sipas raportimeve nga 9to5Mac, një nga veçoritë e reja më interesante është kontrolli i kamerave të iPhone ose iPad përmes AirPods. Kjo do të thotë që përdoruesit do të mund të realizojnë foto duke prekur pjesën anësore të AirPods.
Një tjetër funksion i ri i përfolur është monitorimi automatik i gjumit: nëse përdoruesi bie në gjumë me AirPods në vesh, pajisja do të ndalojë automatikisht çfarëdo që po dëgjon. Ende nuk është e qartë nëse ky funksion do të kërkojë përdorimin e një Apple Watch, i cili tashmë ofron një monitorim të tillë.
Apple gjithashtu mund të prezantojë një komandë të re me lëvizje të kokës për të zgjeruar funksionalitetin e Conversation Awareness – një veçori që ul volumin kur përdoruesi fillon të flasë. Kjo mund të lejojë kontroll më të lehtë të volumit përmes lëvizjeve të kokës.
Një tjetër veçori e re që përflitet është modaliteti i mikrofonit me “cilësi studioje”, që mund të ofrojë tingull më të pastër duke reduktuar zhurmat e sfondit – i ngjashëm me teknologjinë e zërit që u prezantua në iPhone 16.
Së fundi, Apple po punon për ta bërë më të lehtë për studentët lidhjen e AirPods me iPad-ët e përbashkët në shkolla, duke e thjeshtuar procesin. Të gjitha këto risi pritet të konfirmohen zyrtarisht në WWDC javën e ardhshme.
