Së shpejti Apple do të lançojë shërbimin Communication Safety, i cili sapo të jetë aktivizuar nga një prind, do të kryejë skanime automatike në Messages për të filtruar fotografi të ndryshme që mund të përfshijnë lakuriqësi në to.
Ky është vetëm një ndër shërbimet që Apple pritet të prezantojë për të përmirësuar mbrojtjen e fëmijëve nga përmbajtje të tilla në iOS 15. Shqetësimet mbi privatësinë e përdoruesve të Apple kanë bërë që implementimi i këtij shërbimi të shtyhet prej disa kohësh, por kompania ka bërë disa ndryshime mbi mënyrën e funksionimit të shërbimit.
Në versionin origjinal të Communication Safety, Apple kishte planifikuar të lajmëronte prindërit nëse fëmijët e tyre do të merrnin një mesazh që përmbante nuditet, mirëpo kjo gjë nuk do të ndodhë në versionin final të shërbimit.
Tashmë sa herë që Communication Safety të dyshojë se një përmbajtje e caktuar përmban nuditet, do ta bëjë foton të paqartë dhe do të paralajmërojë përdoruesit duke i kërkuar lejen për të shfaqur foton e dërguar.
E mira e këtij shërbimi është se funksionon në të dyja drejtimet. Nëse një fëmijë dëshiron të shpërndajë një fotografi që përmban nuditet, ai do të dekurajohet nga shërbimi i Apple për të mos e shpërndarë, madje duke përfshirë dhe një opsion për të telefonuar një adult.
Apple thotë se i gjithë proçesimi i fotografive do të bëhet brenda në pajisjen tuaj dhe se kompania nuk do të marrë asnjë informacion virtual apo të analizojë bisedat tuaja.
