Amazon ka prezantuar planet për të prodhuar vetë hidrogjen dhe do të bashkëpunojë me kompaninë e Plug Power për të instaluar pajisjen që mund të ndajë molekulat e ujit për të prodhuar hidrogjen në një hapësirë të Amazon në shtetin e Kolorados në SHBA.
Kjo është hera e parë që Amazon po teston këtë pajisje dhe po prodhon hidrogjen me pak karbon për të fuqizuar më shumë se 225 pirunë me energji me qeliza hidrogjeni. “Hidrogjeni është një element i rëndësishëm në përpjekjet tona për të dekarbonizuar operacionet tona deri në vitin 2040 në mbështetje të The Climate Pledge, dhe ne jemi të kënaqur nga aftësia që kemi për të prodhuar hidrogjen në hapësirat e Amazon nëpërmjet këtij partneriteti me Plug,” tha Asad Jafry, drejtues i lartë në Amazon.
“Prodhimi në objektet që janë në pronësi të Amazon do ta bëjë përdorimin e hidrogjenit edhe më efikas në lloje të caktuara makinerish,” shtoi ai.
Pajisja e quajtur Plug 1MW, që përdor energjinë elektrike dhe ujin për të prodhuar hidrogjen, është në gjendje të mbështesë deri në 400 pirunë me hidrogjen. Hidrogjeni i prodhuar nga kjo pajisje do të kompresohet në vend dhe do të ruhet në një depozitë për t’u përdorur nga pirunët.
“Amazon është një partner të vërtetë që njeh rolin thelbësor që luan hidrogjeni në të ardhmen tonë,” tha CEO i Plug, Andy Marsh. “Ky projekt demonstron aftësinë e Plug për t’i dhënë zgjidhje klientëve tanë.”
Deri më sot, Plug ka bashkëpunuar me Amazon duke zëvendësuar bateritë në pirunët me energjinë e hidrogjenit në më shumë se 80 pika të kompanisë në Amerikën e Veriut. Në shumicën e këtyre vendeve, hidrogjeni për të fuqizuar pirunët prodhohet diku tjetër dhe dërgohet me kamionë në një sistem magazinimi dhe shpërndarjeje në vend.
