Studiuesit në La Trobe University kanë arritur të zhvillojnë një algoritëm me inteligjencë artificiale që mund të ketë saktësinë e pajisjeve testuese të frymës (të cilat janë të shtrenjta) në verifikimin nëse një person ka konsumuar alkool.
Kjo teknologji mund të kuptojë nëse një person e ka kaluar limitin e lejuar të alkoolit duke përdorur një regjistrim prej 12 sekondash të zërit të tyre. Në publikimin e bërë në revistën Alcohol përshkruhet se si Audio-based Deep Learning Algorithm to Identify Alcohol Inebriation (ADLAIA) u zhvillua dhe se si ky algoritëm mund të përcaktojë intoksikimin e një personi bazuar në regjistrimin prej 12 sekondash.
“Individët e intoksikuar zakonisht identifikohen duke matur përqëndrimin e alkoolit në gjak nëpërmjet pajisjeve testuese të frymës të cilat janë të shtrenjta. Testimi i intoksikimit të një personi nëpërmjet analizimit të zërit të tij do të ndryshonte gjithçka.”
Algoritmi u zhvillua dhe u testua duke përdorur një databazë ku gjendeshin 12,360 regjistrime audio të personave të intoksikuar dhe atyre jo të intoksikuar. Sipas studimeve, ADLAIA ishte në gjendje të identifikonte folësit e dehur (me përqëndrim alkooli në gjak 0.05% ose më të lartë) me një saktësi deri në 70%, dhe saktësia rritet deri në 76% tek personat me përqëndrim alkooli në gjak mbi 0.12%.
Studiuesit tregojnë se në të ardhmen kjo teknologji mund të përdoret në formën e një aplikacioni në smartphone dhe të përdoret në ambiente si baret apo stadiumet për të identifikuar personat e dehur.
