Një grup i pavarur shkencëtarësh dhe ekspertësh i mbledhur nga NASA nuk gjeti prova se fenomenet anormale të paidentifikuara, të njohura si UAP ose UFO, janë “jashtëtokësore” në natyrë, por theksuan se nevojiten të dhëna më të mira për të kuptuar disa raste që ende nuk kanë një shpjegim.
NASA formoi grupin prej 16 ekspertësh vitin e kaluar për të shqyrtuar se si agjencia hapësinore mund të kontribuojë më mirë në kuptimin shkencor të objekteve, të cilat janë raportuar nga qindra pilotë ushtarakë dhe komercialë. I njohur zyrtarisht si Studimi i Pavarur i Fenomeneve Anormale të Paidentifikuara, grupi publikoi raportin e tij përfundimtar prej 36 faqesh të enjten, me disa rekomandime se si agjencia hapësinore mund të përdorë ekspertizën e saj shkencore për të kontribuar në hetimet e qeverisë për objektet.
“Ky studim na tregon se ka shumë më tepër informacione për të mësuar,” tha administratori i NASA-s Bill Nelson në një konferencë në lidhje me gjetjet. “Ekipi i pavarur i studimit i NASA-s nuk gjeti asnjë provë se UAP-të kanë origjinë jashtëtokësore. Por ne nuk e dimë se çfarë janë këto UAP.”
Çfarë thotë raporti i NASA për UAP?
Raporti nuk përmban asnjë “lajm bombë” të ngjashëm me dëshminë e Kongresit që u bë kryefjalë gjatë verës, kur një ish-oficer i inteligjencës pretendoi se ekziston një program disa dekada i gjatë i qeverisë për të studiuar UFO-t, të cilën Departamenti i Mbrojtjes e mohoi.
Në vend të kësaj, grupi i NASA-s u përqendrua në shqyrtimin se si agjencia hapësinore mund të “kontribuojë në një qasje gjithëpërfshirëse, të gjerë qeveritare për mbledhjen e të dhënave të ardhshme” në lidhje me incidentet e UAP, siç e thoshte raporti. Një zyrë relativisht e re brenda Departamentit të Mbrojtjes e njohur si All-Domain Anomaly Resolution Office ka marrë drejtimin në mbledhjen dhe ekzaminimin e raporteve të UAP nga pilotët ushtarakë, të cilat arritën në rreth 800 që nga maji.
Raporti i NASA-s, i cili u mbështet në informacione të paklasifikuara, vuri në dukje se një grup i vogël i takimeve me UAP “nuk mund të identifikohet menjëherë si fenomene të njohura të krijuara nga njeriu ose natyrore“. Kuptimi i këtyre incidenteve “do të kërkojë metoda të reja dhe të fuqishme për marrjen e të dhënave, teknika të avancuara të analizës, një kornizë sistematike raportimi dhe reduktimin e stigmës së raportimit“, thuhet në raport.
