Shkencëtarët në Brazil kanë njoftuar për krijimin e një vaksine të re inovative me qëllim trajtimin e varësisë nga kokaina dhe derivatët e saj, të quajtur “Calixcoca“. Trajtimi, i cili ka treguar rezultate premtuese në provat mbi kafshët, shkakton një përgjigje imunitare që pengon kokainën të arrijë në tru.
Me fjalë të thjeshta, vaksina do të funksiononte duke parandaluar shfaqjen e efekteve të drogës tek përdoruesit. Studiuesit e përfshirë në projekt shpresojnë se kjo gjë do t’i ndihmojë përdoruesit të thyejnë ciklin e varësisë.
Sipas Frederico Garcia, një mjek psikiatër dhe koordinator i projektit në Universitetin Federal të Minas Gerais në Brazil, nëse trajtimi merr miratimin rregullator, do të shënonte herën e parë që varësia nga kokaina trajtohet duke përdorur një vaksinë. Javën e kaluar, projekti fitoi çmimin kryesor prej 500,000 € në Euro Health Innovation Awards for Latin America medicine, i cili u sponsorizua nga firma farmaceutike Eurofarma.
Vaksina funksionon duke nxitur sistemin imunitar të pacientëve për të prodhuar antitrupa që lidhen me molekulat e kokainës në qarkullimin e gjakut, duke i bërë ato shumë të mëdha për të kaluar në sistemin mezolimbik të trurit, ose “qendrën e shpërblimit“, ku ilaçi normalisht stimulon nivele të larta të hormonit të kënaqësisë, dopaminës. Studime të ngjashme janë kryer në Shtetet e Bashkuara, të cilët janë konsumatorët më të mëdhenj të kokainës në botë sipas Zyrës së Kombeve të Bashkuara për Drogën dhe Krimin. Por këto përpjekje ngecën kur provat klinike nuk treguan rezultate të mjaftueshme, ndër arsye të tjera, tha Garcia.
Calixcoca deri më tani ka rezultuar efektive në testimin e kafshëve, duke prodhuar nivele të konsiderueshme të antitrupave kundër kokainës dhe pak efekte anësore. Studiuesit zbuluan gjithashtu se ai mbronte fetuset e minjve nga kokaina, duke sugjeruar se mund të përdoret tek njerëzit për të mbrojtur foshnjat e palindura të grave shtatzëna të varura.
