Studiuesit japonezë kanë krijuar një robot humanoid me lëkurë “të gjallë”. Ajo që duket si një masë e butë rozë me sy, në të vërtetë është një robot humanoid me ind lëkure të projektuar që e lejon atë të buzëqeshë. Universiteti i Tokios njoftoi eksperimentin e suksesshëm nga grupi i studiuesve të udhëhequr nga profesori Shoji Takeuchi të mërkurën, më 26 qershor.
Takeuchi shpjegoi se si ai dhe ekipi i tij ia dolën të krijonin një robot humanoid me lëkurë “të gjallë” duke marrë frymëzim nga eksperimentet e tij të mëparshme. “Gjatë studimit të mëparshëm mbi një robot në formë gishti të mbuluar me ind lëkure që rritëm në laboratorin tonë, ndjeva nevojën për krijimin e një lidhje më të mirë midis tipareve robotike dhe shtresave të lëkurës,” tha ai.
“Duke imituar strukturat e ligamenteve të lëkurës njerëzore dhe duke përdorur perforacione të bëra posaçërisht në formë V në materiale të forta, ne gjetëm një mënyrë për të lidhur lëkurën me struktura komplekse. Fleksibiliteti natyral i lëkurës dhe metoda e fortë e ngjitjes nënkuptojnë se lëkura mund të lëvizë me përbërësit mekanikë të robotit pa u grisur apo hequr, “vazhdoi Takeuchi.
Takeuchi, i cili ka ekspertizë në fushën e robotikës biohibride, ku takohen biologjia dhe inxhinieria mekanike tha se ai dhe grupi i tij ja kishin dalë të krijonin një fytyrë të ngjashme me atë të njerëzve duke replikuar strukturën sipërfaqësore të fytyrës.
Së shpejti ata po planifikojnë të mposhtin sfidat e tjera si nevoja për të shfaqur rrudha dhe krijimin e një epiderme më të trashë për t’i ngjasuar akoma më tepër lëkurës humane.
