NASA ka reaguar ndaj pretendimeve të përhapura nga profesori i Harvardit, Avi Loeb, se objekti hapësinor 3I/ATLAS mund të jetë një anije kozmike e dërguar nga një civilizim alien. Ky trup qiellor u zbulua më 1 korrik 2025 duke udhëtuar pothuajse dy herë më shpejt se vizitorët e mëparshëm ‘Oumuamua dhe kometa Borisov. Me një bërthamë rreth 5.6 kilometra, ai është dukshëm më i madh dhe mund të ketë origjinë nga një rajon tjetër i galaktikës.
Loeb, i njohur për spekulime të ngjashme më herët, publikoi një punim ku sugjeron se 3I/ATLAS mund të jetë një anije inteligjente që ndjek hipotezen “Dark Forest”: civilizimet e avancuara mund të sulmojnë të tjerët për të mbrojtur burimet e tyre. Ai theksoi se kometa arrin perihelionin në anën e kundërt të Diellit, duke u bërë më e vështirë për t’u vëzhguar, dhe parashikoi se objekti mund të arrijë pranë Tokës në fund të vitit 2025.
“Kjo mund të jetë e qëllimshme për të shmangur vëzhgimet e hollësishme nga teleskopët me bazë në Tokë kur objekti është më i ndritshëm “, shkruan Loeb në blogun e tij.
Megjithatë, komuniteti shkencor ka reaguar me skepticizëm. Astronomët e NASA-s kanë vëzhguar vazhdimisht 3I/ATLAS dhe gjetjet tregojnë se ai sillet si një kometë tipike: ka karakteristika të zakonshme për trupat e ngjashëm. Tom Statler, shkencëtar kryesor për trupat e vegjël të Sistemit Diellor, theksoi se “është kometë dhe bën gjëra tipike të kometave”.
Ndërsa interesi publik për teoritë e Loeb mbetet i lartë, prova shkencore tregon qartë se 3I/ATLAS është një kometë natyrore, vizitor i rrallë dhe jashtëzakonisht i shpejtë në hapësirën ndëryjore. NASA konfirmon se objekti nuk paraqet asnjë kërcënim për Tokën dhe nuk fsheh teknologji alienësh, por mbetet një mundësi e çmuar për studime të thelluara mbi trupat që vijnë nga përtej sistemit tonë diellor.
