Qualcomm lajmëroi gjatë Mobile World Congress 2023, ku Geek Room dhe Neptun janë të pranishëm për të informuar ndjekësit me inovacionet më të reja nga teknologjia, se do të bashkëpunojë me disa prodhues të ndryshëm smartphone-sh si Xiaomi, Vivo, Oppo, Motorola, Nothing dhe Honor për të ofruar komunikimin satelitor në këto smartphone.
Qualcomm prezantoi teknologjinë Snapdragon Satellite në bashkëpunim me Iridium në CES gjatë muajit të kaluar. Duke përdorur këtë zgjidhje, smartphone-t mund të dërgojnë dhe të marrin mesazhe në situata emergjente duke përdorur sinjalin satelitor.
“Duke integruar Snapdragon Satellite në gjeneratën e re të pajisjeve, partnerët tonë do të mund të ofrojnë komunikimin satelitor falë shërbimit komercial global nga grupi i satelitëve LEO, që lejon personat e abonuar të komunikojnë me miqtë apo familjarët në raste emergjence.” tha zëvëndës presidenti i menaxhimit të produkteve në Qualcomm, Francesco Grilli.
Pak ditë më parë ne pamë dhe teknologjinë më të re të komunikimit satelitor të zhvilluar nga MediaTek, e cila kishte avantazhet e saja kundrejt teknologjisë së ofruar nga Apple në iPhone, duke dërguar mesazhe në format të lirë, jo në atë SOS.
