Përgjatë viteve të fundit, Samsung është një shembull në ekosistemin Android për sa i përket mbështetjes së pajisjeve me update të software-it. Me afrimin e afatit të prezantimit të Android 13, kanë nisur të qarkullojnë dhe raportimet mbi versionin One UI 5 që Samsung po përgatit.
Pritet që Samsung të nisë programin beta për One UI 5 në gusht të këtij viti, mirëpo 9to5Google ka arritur të sigurojë disa pamje të hershme të këtij versioni për Samsung Galaxy S22 Ultra dhe ka publikuar disa screenshot-e krahasuese me One UI 4.1 për të treguar diferencat kryesore.
Njoftimet duket se do të jenë të grupuara, njësoj si në eksperiencën stock të Android. Gjithashtu kutitë e dialogut do të hapen në mes të faqjes, dhe jo më në fund të saj, në mënyrë të ngjashme me një Pixel. Megjithatë ekziston mundësia që ky është një version shumë i hershëm dhe Samsung nuk i ka aplikuar akoma ndryshimet.
Gjithashtu duket se Samsung ka në plan të prezantojë dy shërbime të reja për multitasking: Swipe for split screen dhe Swipe for pop-up view, duke rrëshqitur dy gishta nga pjesa e poshtme e ekranit.
Përmirësime të tjera duket se do të vijnë në aplikacionet e sistemit të Samsung, ku galeria do të ketë aftësi për të kopjuar tekstin nga fotografitë, si një shërbim më vete dhe jo si pjesë e Bixby Vision.
Përmirësime të tjera që pritet të jenë pjesë e One UI 5 mund të jenë animimet e rifreskuara, opsioni për të bashkëpunuar me përdoruesit e tjerë në Samsung Notes dhe një botn UWB në panelin Quick Settings.
