Samsung ka prezantuar në Kinë modelin e ri Samsung W26, një version luksoz i Galaxy Z Fold7, duke zgjeruar më tej linjën e saj të pajisjeve me ekran të palosshëm. Ky smartphone vjen pas debutimit këtë verë të Galaxy Z Flip7 FE, Galaxy Z Flip7 dhe Galaxy Z Fold7, ndërsa kompania po përgatitet të sjellë edhe telefonin e saj të parë me 3 ekrane të palosshme, deri në fund të vitit.
Modeli W26 ruan pothuajse të njëjtën bazë teknike me Galaxy Z Fold7, duke përfshirë çipin Qualcomm Snapdragon 8 Elite for Galaxy, baterinë 4,400 mAh me karikim 25 W, kamerën kryesore 200 MP, si dhe ekranet 6.5 inç të jashtëm dhe 8 inç të brendshëm. Pajisja peshon 215 gramë dhe ka trashësi 8.9 mm, identike me Fold7.
Ndryshe nga pritshmëritë, Samsung nuk ka sjellë një version “Flip” të këtij modeli, duke u fokusuar vetëm te W26. Telefoni ofrohet në dy konfigurime: 16 GB RAM me 512 GB memorie për rreth $2,383 dhe 1 TB për $2,664 dollarë. Çmimet janë rreth 280–350 dollarë më të larta se ato të Galaxy Z Fold7 në tregun kinez.
Megjithatë, diferenca justifikohet nga detajet premium: një këllëf ekskluziv Kevlar, zbritje për shërbimet celulare dhe një paketim më luksoz. Dizajni dallohet nga kornizat e arta, ndërsa pjesa e pasme është prej xhami, ndryshe nga materiali qeramik i modelit të mëparshëm W25.
Edhe pse Samsung W26 nuk pritet të dalë zyrtarisht jashtë Kinës, ekspertët mendojnë se do të jetë i disponueshëm përmes importuesve ndërkombëtarë, duke u bërë një zgjedhje tërheqëse për adhuruesit e telefonave të palosshëm me stil luksoz.
