Telefonat e parë inteligjentë nga Samsung të cilët u pasuruan me shërbime të inteligjencës artificiale ishin Galaxy S24, Galaxy S24+ dhe Galaxy S24 Ultra, që u prezantuan në fillim të këtij viti.
Shërbimet e Galaxy AI erdhën më pas dhe në disa telefona flagship të gjeneratave të kaluara. Tani, shefi i kompanisë pohon se Samsung po punon në krijimin e smartphone-ve të rinj të fokusuar në AI që mund të kenë një pamje krejtësisht të ndryshme nga telefonat inteligjentë të zakonshëm.
Duke folur për Australian Financial Review, kreu i Samsung MX, TM Roh tha se telefonat e ardhshëm të fokusuar në AI nga kompania “mund të rezultojnë të jenë rrënjësisht të ndryshëm nga telefonat ekzistues të Samsung“. Ai gjithashtu zbuloi se pjesa më e madhe e ekipit të kërkimit dhe zhvillimit në kompani tani është e përqendruar në telefonat inteligjentë me AI.
Ndërsa TM Roh nuk zbuloi se çfarë saktësisht mund të jetë ndryshe në telefonat e ardhshëm, ai tha se pajisjet mund të jenë më “të lëvizshme”. Është e mundur që forma drejtkëndore të mos jetë e nevojshme në të ardhmen. Telefonat mund të kenë ekrane më të mëdha, të palosshme dhe më shumë sensorë.
Përveç telefonave dhe tabletëve, Samsung ka sjellë disa veçori Galaxy AI në pajisjet e saj wearables, duke përfshirë orët inteligjente dhe kufjet wireless. Pra, është e mundur që në të ardhmen të mos kemi nevojë për telefona me ekran të madh, pasi aksesorët mund të ndihmojnë më tepër.
Ne kemi parë tashmë pajisje rrënjësisht të ndryshme të fuqizuara me AI si Humane AI Pin dhe Rabbit R1, por asnjë nuk ka pasur sukses. Mbetet për t’u parë nëse Samsung mund të sjellë diçka novatore në këtë segment.
