Në janar, Qualcomm prezantoi Snapdragon Satellite, një projekt që synonte të lejonte përdoruesit e Android të dërgonin mesazhe satelitore kur ata nuk kanë shërbim celular në zona të caktuara. Kjo supozohej të ishte përgjigja e kompanisë ndaj veçorisë Emergency SOS të Apple që debutoi në linjën e iPhone 14.
Megjithatë, nisma nuk ka funksionuar ashtu siç kompania shpresonte. Qualcomm po përfundon partneritetin e saj Snapdragon Satellite me prodhuesin e telefonave satelitorë Iridium. Edhe pse dyshja “zhvilluan dhe demonstruan me sukses teknologjinë“, prodhuesit e smartphone-ve “nuk e kanë përfshirë këtë teknologji në pajisjet e tyre“, tha Iridium në një deklaratë.
Prodhuesit e telefonave inteligjentë “kanë treguar një preferencë ndaj zgjidhjeve standarde” për lidhjen satelitore, tha Qualcomm për CNBC. Me fjalë të tjera, ata po kërkojnë për një qasje më të hapur që nuk ka nevojë për një ndërmjetës si në këtë rast të Qualcomm.
Një tjetër arsye mund të ketë qenë dhe kostoja e mesazheve satelitore që mund të ketë dekurajuar edhe disa prodhues. Apple po paguan momentalisht faturën për Emergency SOS.
Tani që marrëveshjes së saj me Qualcomm po i vjen fundi, Iridium thotë se do të jetë në gjendje të punojë drejtpërdrejt me prodhuesit e smartphone-ve, zhvilluesit e sistemit operativ celular dhe prodhuesit e tjerë të çipave. Apple, ndërkohë, ka zgjeruar funksionin e saj SOS emergjent duke shtuar integrimin e zbulimit të përplasjeve në iPhone 15.
Nga ana tjetër, Starlink është vendosur të lançojë shërbimin e saj satelitor SMS vitin e ardhshëm. Ai planifikon të ofrojë funksione të komunikimit zanor dhe transferimit të të dhënave përmes fuqisë satelitore drejtpërdrejt në telefon.
