Poco ka hyrë zyrtarisht në ligën e smartphone-ve flagship. Marka e themeluar nga Xiaomi në vitin 2018, e njohur deri më sot për pajisje të rangut të mesëm, prezantoi në Bali serinë e saj të parë flagship: Poco F8 Ultra dhe Poco F8 Pro. Të dy modelet vijnë me teknologjinë audio Sound by Bose dhe sistemin operativ HyperOS 3, ndërsa kompania premton një kapitull të ri në ambiciet e saj në tregun global.
Sipas Kang Lou, drejtues i marketingut të Poco Global, modeli Ultra vendos “një standard të ri për flagships të vërtetë”, ndërsa F8 Pro synon t’i sjellë përvojat premium “më afër përdoruesit të zakonshëm”.
Flagship-i kryesor, Poco F8 Ultra, shfaqet me një ekran 6.9 inç dhe kombinon dy çipe të dedikuara: Snapdragon 8 Elite Gen 5 dhe procesorin VisionBoost D8, i cili mundëson imazhe me rezolucion të rritur përmes inteligjencës artificiale. Pajisja integron ekranin e ri HyperRGB, me strukturë të avancuar nën-piksela, dhe mburret me baterinë më të madhe të serisë F deri tani, 6500mAh. Versioni “Denim”, edhe pse vetëm vizualisht i ngjashëm me xhinsin, përdor një material të ri nanoteknologjik nga Xiaomi.
Ndërsa Poco F8 Pro, me ekran 6.59 inç dhe dizajn të lehtë të harkuar, vjen me Snapdragon 8 Elite dhe bateri 6210mAh, të aftë për përdorim të vazhdueshëm deri në 16 orë. Ky model synon një balancë mes performancës së lartë dhe çmimit më të përballueshëm.
Në SHBA, çmimet variojnë nga $579 deri në $799, në varësi të konfigurimit. Poco ka paralajmëruar edhe zbritje të hershme prej të paktën $50, por ende nuk ka dhënë një datë zyrtare për prezantimin në tregun global.
