Mes investigimesh e thyerje rekordesh Tik Tok nuk ngelet pa marrë qendrën e vëmendjes asnjëherë.
Kësaj radhe bëhet fjalë për ndryshimet të cilat pritet të hyjnë në fuqi fare shpejt.
Brenda 30 Prillit çdo individ nën 16 vjeç do ti hiqet e drejta për të pasur një DM.
Dhe vetëm nëse jeton në një shpellë nuk ka shanse të mos e dish çfarë është Direct Messages dhe potenciali i madh për keqpërdorim.
Kështu TikTok po përpiqet që të ruajë minorenët nën 16 vjeç nga rreziqet e shumta që qarkullojnë në internet, nga predatorët, ngacmuesit seksual, materialet për adultë etj.
Aplikacioni po i afrohet numrit rekord të shkarkimeve prej 2 miliard, brenda shumë pak kohë, dhe me rritjen e pushtetit rritet edhe përgjegjësia.
TikTok momentalisht po bën kontrollin e të gjitha moshave të deklaruara në aplikacion dhe nga 30 Prilli minorenëve do u hiqet DM.
Por nëse ky është i vetmi nivel sigurie, ngelet për tu diskutuar efektiviteti i nismës pasi të gjithë e dimë sa e lehtë është të gënjesh në internet.
Në mënyrë që të funksionojë do të duhej një bashkëpunim më i gjërë duke përfshirë edhe prindërit e fëmijës, apo shkallë të tjera vërtetësie. Mënyra më efikase do të mbetej një dokument zyrtar por askush nuk do ishte rehat të ndante të dhëna aq delikate
Qëllimi i nismës ngelet pozitiv dhe vazhdon të jetë brenda politikës së TikTok për të bindur botën mbi qëllimet e tyre pozitive sidomos pas investigimeve të senatit amerikan, por sidoqoftë ka mjaft të meta.
