Pas muajsh plot me rrjedhje informacionesh, OnePlus ka prezantuar sot zyrtarisht OnePlus 15 në Kinë. Kompania ka konfirmuar se versioni global do të vijë “së shpejti”, por pa dhënë një datë të saktë prezantimi.
Dizajni i telefonit ishte zbuluar që në shtator, kur OnePlus konfirmoi gjithashtu se pajisja do të fuqizohet nga procesori më i ri Qualcomm Snapdragon 8 Elite Gen 5, duke e pozicionuar si një nga telefonët më të fuqishëm të vitit. Një nga risitë më të spikatura është ekrani me shpejtësi rifreskimi 165Hz, një hap i madh krahasuar me 120Hz të modelit OnePlus 13. Megjithatë, aktualisht pak aplikacione dhe lojëra përfitojnë realisht nga kjo frekuencë e lartë.
Një tjetër veçori që bie në sy është bateria 7,300mAh, pjesë e një prirjeje të re në tregun kinez për telefona me kapacitet të madh energjie. Ende nuk dihet nëse versionet për Evropë dhe SHBA do të ruajnë të njëjtin kapacitet, pasi shpesh prodhuesit kufizojnë këto bateri për tregun vendas.
Në anën fotografike, OnePlus 15 vjen me sistem të trefishtë kamerash 50 megapikselësh, duke përfshirë një lentë periskop të përmirësuar për zmadhim më të thellë. Telefoni gjithashtu ka rezistencë IP69K ndaj ujit dhe pluhurit, si dhe karikim ultra të shpejtë 120W.
Në Kinë, çmimi fillestar është rreth 560 dollarë, një vlerë konkurruese për specifikat që ofron. Krahas tij, u prezantua edhe OnePlus Ace 6, një version më i lirë që pritet të dalë ndërkombëtarisht si OnePlus 15R, me bateri edhe më të madhe prej 7,800mAh, por me kamerë të thjeshtuar me dy lente.
Me performancë të lartë, dizajn premium dhe autonomi të zgjeruar, OnePlus 15 pritet të jetë një nga telefonët më të spikatur të vitit 2025.
