Geek Room ka pëdorur prej 1 viti Samsung Galaxy Z Fold6, dhe mund të themi me bindje se ky telefon ka ndryshuar mënyrën se si e shohim një smartphone. Nuk është thjesht një telefon—është një pajisje hibride, që tërheq shumë interes nga persona që nuk e kanë përdorur më parë, dhe në shumë raste një mjet shumë efikas për punë dhe argëtim. Por si çdo teknologji e avancuar, ka edhe disa kompromise.
Cilësia
Fillimisht, dizajni dhe ndërtimi janë të një cilësie mjaft të lartë. Mekanizmi i hapjes është dukshëm më i rafinuar se ai i gjeneratave të mëparshme. Pas një viti hapje dhe mbyllje të vazhdueshme—ndoshta qindra herë në ditë—mentesha mbetet e fortë dhe e besueshme.
Një shenjë palosje kur ekrani hapet ende duket, por sinqerisht, është diçka që nuk vihet re gjatë përdorimt të përditshëm.
Performanca
Sa i përket performancës, Snapdragon 8 Gen 2 dhe 12GB RAM i jep pajisjes një performancë të jashtëzakonshme për të kryer çdo detyrë shpejt. Asnjë vonesë apo ngecje, madje edhe kur kishim disa aplikacione të hapura njëkohësisht. Bateria na befasoi për mirë, pasi zgjat tërë ditën me një përdorim mesatar.
Mundësitë e ndryshme të përdorimit
Flex Mode ishte një nga veçoritë që na pëlqeu më shumë. Mund të mbash telefonin gjysmë të hapur për video-telefonata, foto pa përdorur duart apo të shikosh video ndërkohë që gatuan. Është vërtet i dobishëm.
Ekrani i brendshëm prej 7.6 inç është i mrekullueshëm. Për lexim, shikim filmash, punë me dokumente apo multitasking me disa aplikacione njëherësh, Fold 5 ofron një përvojë që i afrohet tabletit—por në madhësinë e një telefoni që futet në xhep. Ekrani i jashtëm është pak i ngushtë, duke e bërë shkruajtjen e mesazheve jo aq të lehtë sa kur ekrani është i hapur, por detyrat e shpejta kryhen mjaft mirë dhe lehtë.
Çfarë mund të përmirësohet në serinë e ardhshme?
Një ndër hapësirat më të mëdha për përmirësim është pesha dhe trashësia e kësaj pajisje. Në momentin që futet në xhep i palosur, trashësia mund të ndihet. Gjithashtu përdorimi me vetëm 1 dorë për një kohë të gjatë mund të jetë pak i lodhshëm.
Cilësia e kamerave është mjaft e mirë, por në serinë e ardhshme ne shpresojmë të arrijë nivelin e serisë Ultra, veçanërisht në dritë të ulët.
A do ta rekomandonim këtë pajisje për ndjekësit e interesuar në një smartphone të palosshëm?
Sigurisht që do ta rekomandonim një pajisje të tillë, pasi ajo përshtatet me kërkesat e çdo përdoruesi të smartphone, qoftë ajo e thjeshtë apo profesionale.
Mund të themi pa asnjë dyshim është se Galaxy Z Fold6 është një hap i guximshëm drejt së ardhmes. Edhe pse jo perfekt, është i krijuar mjaft mirë dhe nuk ndihet si një eksperiment.
