Për shkak të problemeve me prodhimin në fabrikat në Kinë të iPhone, iPhone 14 Pro dhe 14 Pro Max janë të shitura në pothuajse të gjithë dyqanet zyrtare. Nëse ju po planifikonit t’i dhuronit dikujt një nga këto iPhone për festat e fundvitit dhe nuk keni arritur akoma të gjeni një të tillë, fati duket se nuk është me ju, pasi kjo situatë pritet të zgjasë deri në fund të dhjetorit.
Megjithatë mos e shikoni këtë ngjarje si një fat të keq, pasi kanë nisur të qarkullojnë fjalë në internet se modelet Pro të gjeneratës së ardhshme do të vijnë me përmirësime të ndjeshme.
iPhone 15 Pro dhe 15 Ultra
Pritet që Apple të përmirësojë akoma dhe më tej linjën Pro të iPhone-ve në gjeneratën e ardhshme, madje pritet gjithashtu një ndryshim në emërtim për të përfaqësuar këto përmirësime. Me shumë mundësi pritja për këto iPhone do t’ja vlejë. Më poshtë do të shikojmë se cilat do të jenë përmirësimet më të mira.
USB-C
E gjithë linja e iPhone 15 pritet të nisë përdorimin e USB-C në vend të portës Lightning. Ky ndryshim do të bëhet për t’iu përshtatur ligjeve më të reja të BE, që kërkon nga çdo kompani të përdorë portën USB-C të karikimit në të gjitha pajisjet elektronike.
Proçesori më i shpejtë A17
Njësoj si çdo vit, mund të prezantohet proçesori i ri A17. Gjatë gjeneratës së kaluar, proçesori i rifreskuar u përdor vetëm në modelet Pro, dhe një gjë e tillë pritet të përsëritet dhe këtë vit.
Butona që nuk janë butona
Modelet iPhone 15 Pro mund të përfitojnë nga teknologjia e re Taptic Engines që do të mundësojë ndjesinë e klikimit të butonit të volumit apo të kyçjes, kur në të vërtetë ato nuk janë butona. Kjo do të jetë e njejta teknologji që Apple përdor në touchpad-in e Macbook Pro.
Të tjera informacione tregojnë se trupi i iPhone 15 Pro do të jetë i mbrojtur nga titanium dhe kënde të pasme të harkuara.
