Që kamera e iPhone është ndoshta pika kryesore shitëse e produktit këtë e dinim, por me videon më të fundit të publikuar ambicia e kompanisë është më e qartë se kurrë. Smartphonat e Apple janë të aftë të xhirojnë materiale në nivel kinematografik.
Kjo demonstrohet në videon më të fundit të publikuar në kanalin zyrtar të Apple France, ai është një film me metrazh të shkurtër me titullin “Le Peintre” në shqip “Piktori“.
Xhiruar nga regjisori parizien J.B. Braud, video paraqet një bojaxhi të keqkuptuar të cilin e ftojnë në një shtëpi aristokratësh për të pikturuar pronaren e saj.
Në film nuk ka asnjë metaforë apo mesazh të fshehtë. Qëllimi i tij është të paraqesë aftësitë e kamerës së iPhone 12, ndriçimin, ngjyrat, fokusi etj. Dhe të themi të vërtetën duket shumë mirë.
Filmi në fakt është vetëm fillimi i një fushate e cila kërkon të promovojë kamerën e iPhone 12 pjesë e të cilës do të jetë edhe një periudhë nga 15 deri në 28 shkurt ku regjisorë francezë do të japin leksione mbi regjizurën me këtë kamera.
Për t’u regjistruar duhet të shkosh tek faqja franceze e Apple, por logjikisht seminaret do të zhvillohen në frengjisht.
