Samsung Galaxy S10 u lançua në vitin 2019 me një kamera selfie prej 10MP, një përmirësim nga kamera e përparme e S9 prej 8MP. Megjithatë kjo kamera selfie ka mbetur e pandryshuar dhe në seritë S21 dhe S22 (përveç modeleve Ultra).

Përmes një raportimi të ri bëhet e ditur se kjo gjë mund të ndryshojë vitin e ardhshëm pasi Samsung po konsideron përdorimin e kamerave 12MP në gjeneratën e re. Këto raportime janë bërë të ditura nga GalaxyClub, i cili pretendon se në pajisjet S23 dhe S23 Plus do të përdoren kamera të reja 12MP. Megjithatë është ende jo e qartë nëse këto kamera do të vijnë sërisht në formën e hole-punch apo do të vendosen nën ekran.

Një tjetër detaj që nuk është bërë i ditur është dhe përfshirja e optical image stabilization në këto kamera. Nga ana tjetër për kamerën e S23 Ultra ka gjithashtu dyshime. Nuk dihet nëse kamera selfie do të rifreskohet me disa megapixel më tepër se kamera 40MP e S22 Ultra apo do të mbetet e njejtë.

Sigurisht ka ende shumë kohë deri në prezantimin e serisë S23, prandaj do të na duhet të presim për informacione të reja gjatë muajve në vijim.