Honor ka prezantuar konceptin e ri të quajtur “Robot Phone”, një smartphone futurist me një kamera të fuqizuar nga AI që del nga pjesa e pasme e pajisjes përmes një krahu të vogël robotik me stabilizim si gimbal. Kamera mund të rrotullohet dhe të regjistrojë foto apo video në çdo drejtim, duke u pozicionuar vetë në bazë të skenës apo subjektit që ndjek.
Aktualisht pajisja ekziston vetëm në formë CGI në një video promovuese, pa një prototip real të prezantuar ende. Në pamje të parë, telefoni ngjan me një model të zakonshëm, por ka një trup disi më të trashë dhe një modul të madh kamere, të ndarë në dy pjesë, nga ku del krahu mekanik.
Sipas Honor, që këtë projekt e përfshin në vizionin e saj “Alpha Plan”, Robot Phone përfaqëson një evolucion emocional të telefonit inteligjent, një pajisje që “kupton, përshtatet dhe evoluon në mënyrë autonome”, duke e bërë atë një shoqërues personal më shumë sesa një mjet teknologjik.
Koncepti ngjason me modelet inovative të së kaluarës, si Asus Zenfone 6 (2019) me kamerë rrotulluese, por Honor synon ta çojë më tej këtë ide duke e pajisur kamerën me AI të avancuar që mund të kuptojë kontekstin e fotos dhe të ndërveprojë në mënyrë inteligjente me përdoruesin.
Honor pritet të zbulojë më shumë detaje dhe ndoshta prototipin real të Robot Phone në Mobile World Congress në Barcelonë në pranverën e ardhshme. Prezantimi u bë në fund të eventit të lançimit të Magic 8, telefonëve të rinj flagship që dalin këtë muaj në Kinë dhe ndërkombëtarisht deri në fund të vitit.
