Google ka prezantuar zyrtarisht serinë e saj të re Pixel 10, duke e shoqëruar lançimin me premtime për përmirësime të mëdha dhe me thumbime ndaj Apple. Modelet e reja janë tashmë në procesin e porosive, përfshirë edhe versionin Pro Fold, ndërsa risitë më kryesore janë procesori më i ri Tensor G5 dhe një bateri me kapacitet më të madh krahasuar me gjeneratën e mëparshme. Megjithatë, çështja që ka hapur debat është menaxhimi i baterisë nga Google.
Që nga Pixel 6a, Google ka futur opsionin Battery health assistance, i cili kufizon tensionin maksimal të karikimit pas rreth 200 cikleve karikimi, duke synuar të zgjasë jetëgjatësinë e baterisë deri në 1000 cikle. Në modelet më të vjetra, kjo veçori ka qenë opsionale, pra përdoruesi mund ta fshihte, por me Pixel 10 është bërë e detyrueshme. Android Authority ka konfirmuar se përdoruesit nuk kanë më mundësi ta çaktivizojnë.
Praktikisht, kjo do të thotë se përdoruesit do të shohin një jetëgjatësi më të kufizuar të baterisë përditë, pasi funksioni ul performancën e karikimit në emër të ruajtjes së shëndetit afatgjatë. Google shpjegon se pas një kohe përdorimi, “mund të vini re një ndryshim të lehtë në performancën e karikimit”, që në realitet nënkupton jetëgjatësi më të shkurtër për t’u përgatitur për plakjen natyrore të baterisë.
Për krahasim, Pixel 8a dhe më të rinjtë janë vlerësuar për 1000 cikle karikimi, ndërsa modelet nga Pixel 3 deri te 7 arrinin rreth 800 cikle. Megjithatë, fakti që Pixel 10 detyron përdorimin e këtij funksioni, pa opsion çaktivizimi, ka gjasa të zhgënjejë një pjesë të përdoruesve që preferojnë kontroll më të madh mbi menaxhimin e energjisë së pajisjes së tyre.
Në fund, Google e paraqet këtë si një masë mbrojtëse për të zgjasur jetëgjatësinë e baterisë, por kompromisi është një performancë më e kufizuar e saj në përdorimin e përditshëm.
