Një burim kinez brenda zinxhirit të furnizimit të Apple ka zbuluar se kompania po zhvillon gjeneratën e dytë të iPhone Air, e cila pritet të sjellë një përmirësim të dukshëm në sistemin e kamerave. Sipas llogarisë në Weibo “Digital Chat Station”, modeli i ri ultra i hollë do të ketë dy kamera të pasme, duke përfshirë një kamerë 48MP Fusion Ultra Wide krahas kamerës ekzistuese 48MP Fusion Main — e njëjta konfigurim që gjendet në iPhone 17 bazë.
Megjithatë, dizajni i iPhone Air do të ruajë ishullin horizontal të kamerës, ndryshe nga vendosja vertikale e lenteve tek iPhone 17. Kjo tregon se Apple planifikon të vendosë dy lentet pranë njëra-tjetrës, duke kërkuar një rishikim të brendshëm të komponentëve për të ruajtur hapësirën e baterisë, një nga sfidat kryesore për këtë model tepër të hollë.
Raportimet sugjerojnë se Apple do të vazhdojë të theksojë lehtësinë dhe trashësinë minimale, edhe pse kjo kërkon inovacione në strukturën e brendshme të pajisjes. Sipas analistit të njohur Ming-Chi Kuo, iPhone Air 2 pritet të dalë në treg në gjysmën e dytë të vitit 2026, së bashku me iPhone 18 Pro, iPhone 18 Pro Max dhe iPhone-in e parë të palosshëm të kompanisë. Një version i tretë, me ekran më të madh, është planifikuar për vitin 2027.
Megjithatë, shitjet e dobëta të gjeneratës së parë jashtë Kinës mund të ndikojnë në këto plane. Burimi “Digital Chat Station”, i njohur për parashikime të sakta në të kaluarën — si specifikat e kamerës së iPhone 15 dhe dizajnin e ekranit të iPhone 12 — jep kështu sinjale të forta se Apple po përgatitet për një evolucion të rëndësishëm në linjën e saj më të hollë të telefonëve.
