Kur vjen puna tek karikimi i shpejtë, Samsung nuk ofron karikimin më të shpejtë në treg në pajisjet që prodhon. Galaxy S23 Plus dhe S23 Ultra arrijnë maksimumin e shpejtësisë së karikimit në 45W përmes karikimit me kabllo, ndërkohë që kompani të tjera që prodhojnë smartphone kanë arritur të ofrojnë në treg pajisje që karikohen super shpejt me 240W.
Sigurisht që një shpejtësi kaq e madhe karikimi nuk është shumë e nevojshme, megjithatë Samsung ka hapësirë për të përmirësuar këtë aspekt të pajisjeve flagship, dhe një gjë e tillë mund të nisë që në vitin e ardhshëm.
Sipas leaker-it RGcloudS, Samsung Galaxy S24 Ultra dhe S24 Plus do të kenë të integruar një lloj të re teknologjie me qeliza të mbivendosura të baterisë, një teknologji që përdoret dhe në bateritë e makinave elektrike. Së bashku me këtë ndryshim të rëndësishëm, leaker-i tregon se dizajni i ri do të mundësojë karikimin e shpejtë 65W në këto smartphone.
Teknologjia e re e baterisë ka disa avantazhe në krahasim me teknologjinë e vjetër: mund të rrisë densitetin e energjisë, duke lejuar kështu prodhuesit që të rrisin kapacitetin e baterisë pa patur nevojë për më tepër hapësirë. Gjithashtu jetëgjatësia e baterisë mund të rritet, performanca të përmirësohet ndërkohë që kostot ulen për kompaninë.
Galaxy S24 Ultra dhe S24 Plus do të përdorin bateri me kapacitet 5,000mAh, por versioni Ultra do të ketë një strukturë tjetër që do të ndihmojë në mbajtjen e temperaturave të ulta të baterisë.
