Sigurisht për shumë persona çmimi i shitjes së iPhone 14 Pro Max është me të vërtetë shumë i lartë. Mirëpo ky çmim nuk mund të krahasohet aspak me versionin më të ri të iPhone 14 Pro Max, i cili ka në pjesën e pasme një orë Rolex.
Dizenjuesit nga Caviar prezantuan smartphone-in luksoz gjatë kësaj jave, i cili përfshin orën Rolex Cosmograph Daytona në ngjyrën e artë, të kompletuar me 8 diamante. Për të gjithë këtë luks të përfshirë në një pajisje të tillë, ju duhet të paguani $135,420 për ta bërë tuajin.
Caviar njihet për prodhimin e versioneve luksoze të pajisjeve elektronike më të përdorura. Më parë ato kanë publikuar një kasë iPhone-i e cila përfshinte një fragment të një dhëmbi 80 milionë vjeçar të një dinosauri, AirPods të veshura me ar 18 karat si dhe një “Tesla” iPhone me panelin e tij diellor.
Mirëpo produkti më i ri, i quajtur Daytona, është pa asnjë dyshim versioni më luksoz. Trupi i iPhone është i krijuar prej materialit të titanium, dhe ajo që bie në sy është prezenca e orës Rolex Cosmograph Daytona 40mm.
“Mjeshtërit në Caviar përpiqen gjatë gjithë kohës që të tejkalojnë arritjet e tyre të mëparshme,” shkruan Caviar në website-in e saj. “Kësaj here, qëllimi ishte përfshirja e një ore Rolex në trupin e një iPhone 14 Pro Max. Rolex Daytona në ngjyrën e artë është një vepër arti në vetvete.”
