Apple ka bashkëpunuar me markën japoneze të modës Issey Miyake për të prezantuar produktin e ri iPhone Pocket, një çantë elastike 3D e thurur posaçërisht për të mbajtur një iPhone dhe sende të vogla.
Issey Miyake, e njohur për dizajne novatore dhe pëlhura të palosura, është shtëpia e modës e themeluar nga stilisti i ndjerë japonez që krijoi edhe golfin e famshëm të zezë të Steve Jobs.
Sipas njoftimit të Apple, iPhone Pocket ruan “cilësitë origjinale të palosjeve të Issey Miyake”, duke përdorur një material shumë elastik që lejon përdoruesin të shohë ekranin e telefonit edhe pa e nxjerrë nga çanta. Kjo bëhet falë tekstilit të hapur, i cili kur tërhiqet, zbulon ekranin për të kontrolluar njoftimet.
Çanta mund të mbahet në disa mënyra – si çantë dore, e varur rreth trupit, ose e lidhur në një çantë tjetër. Ekzistojnë dy versione kryesore: një me rrip të shkurtër, i disponueshëm në tetë ngjyra, dhe një me rrip të gjatë, në tre ngjyra. Edhe pse në pamje të parë duket si një “çorape luksoze për telefon”, pëlhura me cilësi të lartë dhe struktura e dallon nga materialet e zakonshme.
Megjithatë, çmimi ka ngjallur diskutime: modeli me rrip të shkurtër kushton $149,95, ndërsa ai me rrip të gjatë $229,95, çmime që mund të nxisin shumë njerëz të krijojnë versione më të lira me materiale që gjejnë në shtëpi.
iPhone Pocket do të dalë në shitje më 24 nëntor, në Apple.com dhe në dyqanet zyrtare në shtete si Franca, Kina, Italia, Japonia, Singapori, Koreja e Jugut, Mbretëria e Bashkuar dhe SHBA.
