Apple ka publikuar versionin e 3-të beta të iOS 26.2, një përditësim relativisht i vogël që pritet të dalë zyrtarisht në dhjetor. Versioni i ri sjell disa përmirësime interesante: përmirësime të mëtejshme në ndërfaqen Liquid Glass, tekstet e këngëve offline në Apple Music dhe funksionalitete të zgjeruara për Apple Podcasts. Megjithatë, risia më intriguese ndodhet në kodin e këtij versioni, që zbulon se Apple po punon për një sistem të ri që lejon përdoruesit të zëvendësojnë Siri me një asistent tjetër virtual.
Sipas referencave të fshehura në kodin e iOS 26.2 beta 3, Apple po zhvillon një framework të ri që mundëson zgjedhjen e një asistenti tjetër. Edhe pse funksioni është aktualisht i çaktivizuar, gjurmët në kod tregojnë se do të ketë një seksion të ri në Settings ku përdoruesit mund të zgjedhin asistentin e preferuar zanor. Pasi të vendoset, aktivizimi do të mund të bëhet përmes butonit anësor, njësoj si Siri. Referenca të mëparshme në betat e kaluara sugjerojnë se Apple po eksperimenton edhe me personalizimin e funksioneve të këtij butoni.
Kodi tregon gjithashtu se asistentët e palëve të treta do të kenë mundësinë të shfaqin një lloj ndërfaqeje speciale direkt në Home Screen (Springboard), jo vetëm të hapen si aplikacion i veçuar. Kjo mund të hapë rrugën për integrime më të thella, si p.sh. zëvendësimi i Siri me ChatGPT apo Gemini në nivel sistemi.
Lëvizja është në linjë me përpjekjet e Apple për të bërë iOS më të hapur në zgjedhjen e aplikacioneve kryesore, si dhe për të përmbushur kërkesat e rregulloreve të BE-së. Ky funksion mund t’i kënaqë edhe përdoruesit e pakënaqur me Siri, sidomos duke pasur parasysh se Apple ende nuk ka sjellë versionin e ri të asistentit të bazuar në Apple Intelligence. Megjithatë, ekziston mundësia që opsioni të kufizohet vetëm për përdoruesit brenda BE-së.
