Sipas raportimeve nga Esper, Google po punon për të sjellë një shërbim të ri në Android 13 që mund të jetë tepër i rëndësishëm për personat që përdorin 2 karta SIM në një smartphone të vetëm.
Ky shërbim do të quhet Multiple Enabled Profiles, dhe përmes tij do të bëhet i mundur përdorimi i 2 profileve të ndryshme në një eSIM të vetëm që mund të lëvizë lehtësisht ndërmjet rrjeteve. Google po e mbështet këtë shërbim në një patentim të bërë gjatë vitit 2020, ku përfshihet ndarja e ndërfaqjes ekzistuese të SIM në dy lidhje dixhitale.
Më herët kanë qarkulluar disa raportime se kompania ka nisur testimin e këtij shërbimi në një hardware Pixel të veçantë.
Sigurisht një ndryshim i tillë është i mirëpritur, pasi do të lejojë prodhuesit të eleminojnë hapësirën që i kushtohet kartës SIM dhe do ta shfrytëzojnë atë për të përfshirë një bateri më të madhe në pajisje ose për të rikthyer kartat microSD.
Në këtë raportim tregohet se shërbimi do të debutojë me Android 13, por ajo nuk do të jetë ekskluzive për Android dhe do të mund të implementohet dhe në iOS apo Windows.
