Tmerri i flashit të fotove gjatë natës është zëvendësuar më në fund me modalitetin e natës ku programi i kamerës bën punën më të madhe. Dhe pavarsisht nëse smartphoni yt është flagship apo thjesht 2-3 vjet i vjetër, një farë forme e saj ndodhet patjetër edhe në të. Rezultatet ndryshojnë nga njëri aparat në tjetrin natyrisht ama ekziston një listë rregullash e cila aplikohet tek të gjithë edhe nëse nuk e kanë modalitetin Night Mode, ndaj pa e zgjatur:
1. Aktivizo Night Mode
Nëse ke një iPhone, sistemi e kupton automatikisht kur objektivi është në errësirë, ndaj mjafton të hapësh kamerën e të proçedosh. Për Androidët që besojnë në vullnetin e lirë, duhet ta aktivizosh atë, nëse ke një Samsung rrëshkit majtas ose djathtas në aplikacionin e kamerës derisa të gjesh modalitetin e duhur. Në varësi të aparatit tek markat e tjera duhet të kërkosh tek menuja e aplikacionit.
2. Gjej dritën
Përveç smartphonëve flagship super të shtrenjtë që bëjnë foto fantastike edhe në kushtet më të këqija eë ndriçimit, gjithsesi do të të duhet drita. Shmang pyjet e pabanuara dhe gjej vendet më të populluara, sidomos tani që zbukurimet nuk mungojnë askund. Vetëm kij kujdes, menaxho mirë burimin e dritës nuk është mirë që fokusi të jetë direkt tek poçi i dritës, më mirë të jetë aty ku reflektohet ajo.
3. Gjej momentin e duhur
Rrugët e boshatisura gjatë natës janë vërtetë romantike, por ndoshta do të doje që të shtoje pak mister me një kalimtar rastësor. Gjej edhe ndonjë kënd të mirë, e kij kujdes me kompozimin e kuadrit, duhet të kesh kontroll absolut mbi çfarë zgjedh të përfshish e çfarë jo. I duruari i fituari.
4. Mos u dridh
Vetëm në rast se e ke të qëllimshme, dridhja e aparatit nuk përkthehet asnjëherë mirë në foto. Dora e lirë nuk është alternativa më e mirë, nëse nuk e ke një stativ me vete, mbaje smartphonin me të dyja duart, afroje atë drejt kraharorit dhe vëri bërrylat mbi stomak. Kjo do të të japë shumë stabilitet, i nevojshëm shumë sidomos nëse do të bësh foto me ekspozim të gjatë, rezultatet e të cilit të ftojmë që t’i shijosh.
5. Edit-o fotot
Nuk e kemi fjalën për filtrat e Instagramit, kjo do të ishte një zgjidhje shumë dembele dhe aspak kreative. Me cilësinë e lartë që smartphonët fotografojnë sot, ka shumë dorë për modifikime deri edhe profesionale. Dy aplikacionet falas që ofrojnë strumente vërtetë serioze janë Adobe Lightroom dhe Snapseed. Edhe në YouTube do të gjesh pafund tutoriale për to.
