Sikur të mos mjaftonte ekskluziviteti i gjeneratës së pestë të konsoleve nga Sony këtë sezon, PS5 merr një tjetër shtresë luksi, edhe pse jo nga kompania mëmë. Janë rusët e Caviar ata që e kanë marrë përsipër të veshin konsolen me flori 18 karatsh. Pamjet digjitale të asaj çka do të jetë PlayStation 5 Limited Edition tregojnë dy pllakat e floririt që veshin dy krahët anësorë, stilizuar me relieve tre dimensionale që i ngjasojnë një shkëmbi duke i dhënë edhe emrin e merituar “Golden Rock“.
Caviar thotë se të paktën 30kg ar u deshën për të nxjerrë në dritë këtë produkt, përveç njësisë kryesore edhe dy leva kontrolli janë stilizuar me flori dhe lëkurë krokodili duke ruajtur estetikën. Një lingot ari krejt moderne. Nuk dihet se si do të ndikojnë në menaxhimin e nxehtësisë kjo sasi metali e shtuar por, në këtë pikë kush po shqetësohet për plastikën më.
Përndryshe, konsolja do të funksionojë si gjithë të tjerat. E kjo nuk e pengon aspak që të kushtojë stratosferikisht më shumë se ato, një kilogram ar i tillë kushton € 50,000, kostot e prodhimit të tij shkojnë logjikshëm deri në €1,500,000, më pas duhen llogaritur taksat, jopo haku i punës etj. Mësohet se “Golden Rock” do të vijë me dy leva shoqëruese, mirë kjo të paktën e justifikon.
Sa do të prodhohen? Një, vetëm një. Me këtë lloj ekskluziviteti le t’ia lëmë imagjinatës etiketën e çmimit kur të vihet në vitrinë.
Por PS5 Gold Edition do të shoqërohet gjatë 2021 edhe me 3 shokë të tjerë të florinjtë! Përmes një video në YouTube, kompania ka konfirmuar se do të sjellë edhe Samsung Galaxy S21, Airpods Max si dhe një palë Nike Air Jordan të veshura në flori.
