Tentativat më të fundit për të pastruar qëndrimet e mbajtura deri më dje nga industria e video-game karshi figurës së femrës dhe minoriteteve, janë produkt i vëmendjes dhe përfaqësimit sa më të gjerë. Kujtojmë këtu The Last of Us Part II i cili mes zjarreve kritike ia doli të sillte një eksperiencë më diverse se kurrë.
Ndërkohë skandali i Ubisoft na tregon se problemi fshihet shumë më thellë, pikërisht në vetë studiot që krijojnë lojrat tona të preferuara.
Në fillim të korrikut drejtori kreativ i Splinter Cell dhe Far Cry Maxime Beland dha dorëheqjen nga posti i tij në Ubisoft për shkak të akuzave për abuzim me detyrën. Dy drejtues dhe disa punonjës të tjerë të kompanisë janë pushuar nga puna pas akuzave për sulme seksuale dhe ngacmime kundër një numri të madh vartësisht të Ubisoft.
Drejtori kreativ i AC Valhalla Ashraf Ismail gjithashtu u largua nga pozicioni pasi një sërë detajesh nga jeta e tij personale u postuan në Twitter.
Episode të tilla janë përsëritur vazhdimisht në rrjete sociale përgjatë një muaji, duke detyruar nisjen e një investigimi kundër krijuesve të Assassin’s Creed.
Ambienti toksik si dhe roli Serge Hascoet shefit kreativ të Ubisoft, në krijimin e këtij ambienti janë publikuar në një raport nga gazeta franceze Liberation në 10 korrik.
Shefi i ICO Partners Thomas Bidaux ka përkthyer copëza nga artikulli dhe nga ajo që lexojmë është vërtetë i tmerrshëm dhe i paimagjinueshëm niveli i shkeljve. Një ambient i rrezikshëm për këdo që nuk është në pozicione favorizuese apo që i përket komuniteteve në minorancë.
Në një deklaratë publike në qershor Ubisoft kërkonte ndjesë dhe konfirmoi fillimin e një proçesi investigativ me ndihmën e këshilluesve të jashtëm.
Shefi ekzekutiv dhe bashkë themeluesi Yves Gulliemot u shpreh se “ Ubisoft ka dështuar në detyrën e tij për ti garantuar një mjedis pune të sigurt e gjithëpërfshirës për punonjësit e tij.
Kjo është e papranueshme pasi sjelljet toksike janë në kontrast direkt me vlerat me të cilat nuk kam kompromentuar dhe nuk do ta bëj kurrë.”
Kjo situatë e nderë vjen pikërisht përpara eventit të sotëm Ubisoft Forward tek i cili priten të shfaqen edhe Assassin’s Creed Valhalla, Watchdogs: Legion dhe Far Cry 6.
Nuk dihet se cili do të jetë qëndrimi i komunitetit ndaj gjigandit të videolojrave dhe vetë titujve të tyre, nëse ka një anë për të mbajtur në këtë mes kjo është fare e qartë, që secili duhet të bëjë çfarë mundet për të denoncuar cilëndo kundravajtje.
Rrjetet sociale vërtetuan që mund të bëjnë një ndryshim, ndaj në diskriminimin e radhës që hasim qoftë në kompani apo edhe ndaj gamerave vajza, një share mund të ndihmojë më shumë nga ç’mendojmë.
