Disa raportime të reja po tregojnë se Sony po planifikon të përfshijë reklama brenda lojrave në PlayStation. Kjo lëvizje duket shumë e ngjashme me atë të Microsoft, e cila para pak ditësh tregoi se po teston përfshirjen e këtyre reklamave në platformën e saj Xbox.
Sony nuk dëshiron të mbetet pas në këtë drejtim, dhe besohet se ka nisur testimin me partnerë të ndryshëm për të ndihmuar zhvilluesit e lojrave të krijojnë reklama brenda lojës përmes një software developer program. Ideja është inkurajimi i zhvilluesve në krijimin e lojrave falas, ndërkohë që mund të përfitojnë para nga reklamat e përfshira në to. Kjo mundësi duket si një situatë tepër interesante si për zhvilluesit dhe për gamers-at.
Kjo përpjekje e re pritet të lançohet në fund të këtij viti, dhe avantazhi i tyre është se po tentohet përfshirja e reklamave në mënyrë që të mos ndërpresin eksperiencën e lojës, si përshembull vendosja e tyre në stenda të veçanta reklamimi. Disa formate të tjera mund të përfshijnë dhe video-reklama të cilat shpërblejnë personin që i shikon me avatar skins apo me items brenda lojës.
Sony nuk ka vendosur ende nëse do të marrë një përqindje të fitimeve të gjeneruara nga kjo strategji, sipas raportimeve të fundit.
