Playstation dhe Xbox dita ditës po hapin letrat në tavolinë, dhe ndërsa akoma po mundohemi të zgjidhim matematikën e numrave të performancës së secilit, hapi i radhës i takon edhe levave të kontrollit.
Sony sulmon e para duke publikuar atë të cilën nuk do ta quajë më “DualShock” por “DualSense” për të përshkruar kështu më së miri aftësitë e reja që do të mbartë.
E para dhe ndoshta më e rëndësishmja është reagimi haptik në DualSensin wireless.
Më shumë sesa thjesht vibrime të përgjithshme, leva imiton një varietet dridhjesh për të arritur sa më shumë ndjesi. Për shembull ndjesinë e ngadalësisë kur nget një makinë në baltë apo peshën e rëndë kur tërheq fijen e një harku.
Vlen për tu theksuar se e gjithë teknologjia është integruar pa shtuar peshë të panevojshme.
Së dyti, mikrofoni. Pavarsisht se edhe vetë Sony e pranon se nuk do të konkurrojë kurrë me cilësinë e headsetit është një lehtësi të cilën kompania merr përsipër ta ofrojë në eksperiencën e tyre të gaming.
Së fundi butoni “share” tashmë quhet “create” dhe sigurisht që nuk bëhet fjalë për një ndërrim të thjeshtë emri. Funksionet e tij pritet të bëhen të ditura në vazhdim.
Sa i përket design-it DualSense ka ndryshime thelbësore. Krahët e levës janë më drejtkëndor, me një lakim anësor për jashtë. Touchpad-i është më i madh dhe i hapur në pjesën e sipërme ndërkohë që ndriçimi blu anash i shton shumë hijeshi.
Në përgjithësi duket të ketë marrë frymëzim nga Xbox Elite Controller dhe Switch Pro Controller por ngelet padyshim një bukuri më vete dhe në mënyrë të pagabueshme një produkt Sony.
Linjat, ngjyrat forma dhe funksionet e reja padyshim që e bëjnë DualSense të jetë në lartësinë e historisë që tërheq pas vetes, Geek Room aprovon.
