Prej shumë kohësh mendohej se luajtja e video-lojrave nuk ishte një aktivitet që lidhej me rritjen e aftësive mendore dhe shumë prindër dëshirojnë t’i mbajnë fëmijët e tyre sa më larg qëndrimit para ekraneve.
Mirëpo një studim i ri ka zbuluar se luajtja e video-lojrave për disa orë në ditë mund të përmirësojë disa aftësi kognitive, si përshembull ato që përfshijnë kontrollin e impulseve dhe memorien. Në këtë studim morën pjesë më tepër se 3,000 fëmijë në moshat 9-10 vjeç të cilët luanin video-lojra 3 orë në ditë, dhe në fund u kuptua se këta fëmijë kishin një rezultat më të lartë në testin e aftësive kognitive se fëmijët që nuk kishin luajtur kurrë lojra.
Ky studim është pjesë e një studimi akoma më të madh në SHBA, të quajtur Adolescent Brain Cognitive Development Study që mbështetet nga National Institutes of Health. Më përpara ka pasur studime që kontrollonin lidhjet midis lojrave kompjuterike dhe aftësive të trurit, mirëpo mekanizmat neurobiologjikë ende nuk janë të mirëkuptuar.
Fëmijët “gamers” ishin më të shpejtë dhe më të saktë në të dyja testet e lartpërmendura në krahasim me fëmijët e tjerë. Për më tepër, imazheria MRI e trurit zbuloi se truri i gamers kishte nivele më të larta aktiviteti në regjionet që lidhen me kujdesin dhe memorien.
