Microsoft ka premtuar që gjenerata e ardhshme e Xbox do të bashkojë botën e konsolave dhe PC-ve duke mbështetur lojëra nga dyqanet e palëve të treta dhe gjeneratat e vjetra të Xbox. Megjithatë, raporte të reja sugjerojnë se ky vizion mund të përballet me sfida të mëdha për shkak të licencimit nga botuesit dhe ndryshimeve të modelit të biznesit, gjë që mund të çojë në rritje të ndjeshme të çmimit të harduerit.
Sipas një rrjedhjeje nga KeplerL2, konsola e re e Microsoft mund të kushtojë rreth dyfishin e PlayStation 6, për shkak të harduerit shumë të fuqishëm dhe synimit të kompanisë për ta shitur me fitim, ndryshe nga praktika e zakonshme e shitjes me humbje për të kompensuar me të ardhura nga lojërat. Gjithashtu, pajisjet e reja të markuara si “Xbox PC”, të bazuara në të njëjtën teknologji çipesh, mund të mos jenë kompatibël me lojërat e vjetra Xbox.
Ky ndryshim lidhet me përpjekjen e Microsoft për të kombinuar fuqinë e Windows dhe Xbox. Një pajisje që luan lojëra nga Steam mund të ulë të ardhurat nga licencat e palëve të treta, duke e detyruar kompaninë të rrisë çmimin e konsolës. Për më tepër, APU i ri i koduar Magnus pritet të jetë i madh dhe i fuqishëm, duke shtyrë performancën dhe çmimin përtej PS6.
Në qershor, Microsoft njoftoi mbështetje për backward compatibility dhe forcoi partneritetin me AMD për zhvillimin e çipeve të rinj. Kjo ka ngritur spekulime për pajisje të reja nga prodhues të tjerë PC, si Asus ROG Xbox Ally, që shihet si prototip i një linje të ardhshme “Xbox PC”. Megjithatë, Kepler thekson se pajisjet e tilla ndoshta do të luajnë vetëm lojëra PC, pasi botuesit nuk do të lejojnë transferimin automatik të licencave ekzistuese të Xbox.
Një pasardhës i ROG Xbox Ally do të përdorë APU me arkitekturën Medusa të AMD, duke sjellë CPU Zen 6 dhe 24 njësi grafike RDNA 5 me konsum energjie 28W, një përmirësim i madh krahasuar me handheld-ët aktualë si Steam Deck.
