Nintendo ka paralajmëruar përdoruesit e Nintendo Switch 2 në Japoni që të mos e përdorin konsolën në temperatura shumë të larta ose shumë të ulëta. Duke marrë shkas nga valët e të nxehtit në disa zona të Japonisë, kompania publikoi një deklaratë në rrjetet sociale ku paralajmëron se luajtja në “mjedise me temperatura të larta” mund të rrisë temperaturën e pajisjes dhe të shkaktojë “defekte”. Rekomandimi është përdorimi në mjedise midis 5–35°C.
Nintendo theksoi gjithashtu se temperaturat nën 5°C mund të jenë problematike, gjë që shkaktoi reagime nga lojtarë në zona të ftohta si Hokkaido, ku temperaturat në dimër bien shpesh nën zero.
Megjithëse kompania nuk dha një shpjegim teknik të detajuar, dihet se përdorimi i pajisjeve elektronike në temperatura ekstreme mund të ngadalësojë shpejtësinë e karikimit, të dëmtojë baterinë dhe të shkurtojë jetëgjatësinë e pajisjes.
Ky paralajmërim vjen ndërsa Nintendo po përjeton një sukses të madh me Switch 2. Në muajin e parë të prezantimit janë shitur 5.82 milionë njësi në mbarë botën dhe 5.63 milionë kopje të Mario Kart World, duke arritur një raport blerjesh të përbashkëta prej rreth 97%. Në të njëjtën periudhë, shitjet e përgjithshme të lojërave për Switch 2 kanë arritur 8.67 milionë njësi, ku Mario Kart World përfaqëson 65% të tyre.
Nintendo e ka quajtur këtë model pajisjen më të shitur në muajin e parë pas prezantimit në historinë e saj, duke thyer rekorde edhe në SHBA, ku ka kaluar edhe PlayStation 4 për shpejtësinë e shitjeve.
