Minecraft vazhdon të tregojë se është më shumë se një lojë, duke u shndërruar në një platformë eksperimentale për krijimtari pa kufij. Shembulli më i fundit vjen nga krijuesi sammyuri, i cili ka ndërtuar brenda lojës një model të vogël gjuhësor të quajtur CraftGPT, duke përdorur vetëm mekanikat bazë të redstone.
Projekti është kolosal në përmasa, duke zënë një hapësirë prej 439 milionë blloqesh (1,020 x 260 x 1,656). Për ta paraqitur të plotë, u desh madje edhe përdorimi i mod-it distant horizons. CraftGPT përmban mbi 5 milionë parametra dhe është trajnuar në Python me dataset-in TinyChat. Edhe pse funksional, sammyuri paralajmëron se modeli shpesh del jashtë teme, shkruan me gabime gramatikore ose prodhon përgjigje të pakuptimta.
Performanca është një tjetër kufizim. Në një server me redstone të optimizuar, ku ritmi i lojës rritet me 40,000x, modeli arrin të gjenerojë një përgjigje për rreth dy orë. Nëse do të përdorej ritmi normal i Minecraft, një përgjigje do të kërkonte gati 10 vite.
Për ata që duan ta provojnë, të gjitha skedarët dhe udhëzimet janë të publikuara në GitHub. Kërkesat harduerike janë të larta: minimumi 32GB RAM, me rekomandim 64GB për funksionim më të mirë.
Si shumë krijime të tjera marramendëse në Minecraft – si hard disku funksional me vetëm 1KB kapacitet ose kompjuteri i ndërtuar brenda lojës që luan Doom – edhe CraftGPT nuk ka vlerë praktike, por qëllimi i tij është të tregojë mundësitë e pafundme të lojës dhe kreativitetin e komunitetit.
Ky projekt thekson se Minecraft nuk është vetëm argëtim, por edhe një laborator digjital ku idetë më të çmendura mund të marrin formë reale, duke sfiduar kufijtë e imagjinatës.
