Nintendo Switch 2, pasardhësi i konsolës Nintendo Switch, do të vijë në treg në vitin 2025.
Gjigandi i lojërave Nintendo lajmëroi këtë të enjte ekzistencën e versionit të ri të konsolës në një njoftim të shumëpritur nga fansat, të cilët prej shumë kohësh dëgjojnë thashethemet për prezantimin e tij.
Në një video të re promovuese, Nintendo shfaq një version më të madh të Switch që duket i ngjashëm me paraardhësin e tij. Videoja tregon gjithashtu se kontrollorët e sistemit, ose Joy-Cons, tani janë ngjitur në anën e njësisë kryesore, pasi më parë rrëshqisnin për t’u futur në vend. Nintendo Switch 2 do të luajë lojëra ekskluzive të Switch 2, si dhe lojëra fizike dhe dixhitale Nintendo Switch. Disa lojëra Nintendo Switch mund të mos mbështeten ose të jenë plotësisht të pajtueshme me Nintendo Switch 2, tha kompania.
Njoftimi nuk dha shumë detaje mbi konsolën ose një datë specifike të daljes në treg. Kompania pretendon se më shumë informacion rreth sistemit do të jetë i disponueshëm gjatë eventit Nintendo Direct të kompanisë në prill. Zhvilluesi i lojërave me bazë në Kioto tha se do të organizojë gjithashtu evente “Nintendo Switch 2 Experience” në disa vende, ku lojtarët mund të kenë një përvojë praktike me sistemin e ri. Këto ngjarje janë planifikuar për qytete të tilla si Los Anxhelos, Nju Jorku, Londër dhe Paris duke filluar nga muaji prill. Regjistrimi i biletave për ato ngjarje fillon të premten, tha Nintendo.
