Ubisoft lançoi trailerin e mënyrës së lojës së Assassin’s Creed Valhalla dhe na lejoni t’ju themi se kjo do të jetë pa asnjë pikë dyshimi gjenerata më epike e të gjithë serisë. Përveç ngjyrimit special që atmosfera vikinge i vesh lojës, dinamika, avancimi dhe aksioni i Valhalla janë lart! Shumë lart!
Historia tashmë e ditur e Eivorit dhe luftëtërëve të tij apo saj përshkon periudhën e pushtimeve vikinge të brigjeve Angleze.
Ajo për të cilën të gjithë po shpresonim konfirmohet që në fillim të videos, teksa grafikat tregojnë lundrimin e anijeve totalisht të mundur. Nuk dihet ende për beteja në det të hapur por mësymjet nga anija në qyteza bregdetare janë një pjesë aksioni e veçantë teksa luftëtarët të ndihmojnë në detyra të ndryshme si luftimet me armiqtë, thyerja e dyerve dhe vjedhja e mallrave të rënda.
Përgjatë gjithë sagës së AC jemi mësuar tashmë të shohim ndërtimin e qyteteve të reja, por asnjëherë nuk kishim parë shkatërrimin e të vjetrit, si një aspekt i ri gati për tu eksploruar në një open world në dukje mjaft të detajuar . Prej rrënojave të vjetra kolonizimet vikinge nisin të marrin jetë, sa më shumë materiale të mbledhësh aq më të fuqishme bazat e tua. Më të fuqishme bazat më efektiv pushtimi i Britanisë.
Ndërsa armiqtë dhe dyluftimet janë pikërisht qejfi i vërtetë në këtë lojë.
Asnjherë nuk kemi parë kaq larmi arketipesh armiqsh dhe aftësish të tyre. Secili kundërshtar sifdon në mënyra të ndryshme, për më tepër disa prej tyre do të bashkohen me aleatët e tyre dhe do lëshojnë një sulm të koordinuar, njejtë si ti. Ndërsa të tjerë do të të qëllojnë me objekte afër tyre, përfshi këtu edhe kufomat që dergjen në fushë-betejë.
Por nga ana tjetër edhe Eivor është më i pajisur se kurrë, me një kundërpërgjigje për këdo, mënyra të reja dyluftimi, lëvizje të dedikuar për të të dhënë mundësinë e krijimit të stilit tënd unik dhe së fundmi varietet armësh si asnjëherë më parë kurorëzuar nga sëpatat klasike vikinge.
Grafikat e vdekjes së kundërshtarit kanë marrë trajtim gjithashtu, aq sa ndonjëherë ngatërrohesh nëse je në Assassin’s Creed apo Mortal Combat.
Eksplorimi dhe artizanati vazhdojnë të mbeten pikë integrale e lojës, teksa zbulon zona të reja. Hetimi i siteve pagane si dhe grumbullimi i materialeve dhe gjuetia do të rafinojnë armatimet e tua.
Kujtojmë që historia kryesore e një AC nuk përbën zakonisht as 40% të të gjithë lojës, thënë kjo edhe Valhalla do jetë e mbushur me side quests dhe sekrete.
Rikthehemi tek mësymja e ushtrisë tënde si element i ri dhe shumë tërheqës i kësaj serie. Teksa futesh më thellë në Angli, edhe qëndresat forcohen, duke bashkëpunuar me luftëtarët e tu shpesh do të duhet të penetrosh fortesa të fuqishme, të përballesh me ushtritë kundërshtare dhe të gjesh strategjinë e duhur. Si kurrë më parë Valhalla teston edhe aftësitë organizuese të lojtarit.
Mitologjia dhe tradita nordike është në qendër të lojës, e megjithatë protagonisti i lojës mund të ndryshohet sipas preferencës. Do të ishte naive të mendonim se një protagoniste femër u prezantua në lojë vetëm për të qetësuar gjakrat e trazuar këto javët e fundit, pasi loja ka të paktën një vit që punohet. Por zgjedhja për të mbajtur Eivorin femër gjatë gjithë trailerit zyrtar, nuk kaloi pa u vënë re.
Këto janë përshtypjet e para nga materiale të zgjedhura nga vetë Ubisoft sigurisht, për një opinion të saktë do të na duhet të presim derisa ti vëmë duart mbi të për një review.
Dalja zyrtare është shënuar në kalendar për 17 Nëntor.
