Zyrtarët kinezë janë në bisedime paraprake rreth një opsioni të mundshëm për t’ia shitur operacionet e TikTok në Shtetet e Bashkuara miliarderit Elon Musk, nëse aplikacioni i videove të shkurtra nuk është në gjendje të shmangë një ndalim të afërt, raportoi të hënën Bloomberg News.
Zyrtarët e Pekinit preferojnë që TikTok të mbetet nën kontrollin e mëmë Bytedance, thuhet në raport, duke cituar burime me dijeni rreth kësaj ngjarje. Operacionet e TikTok në SHBA mund të shiten ose përmes një procesi konkurrues ose një marrëveshjeje nga qeveria, duke sugjeruar që e ardhmja e aplikacionit nuk është më vetëm në kontrollin e ByteDance.
Qeveria e Kinës ka një “pjesë të artë” në ByteDance, për të cilën disa anëtarë të Kongresit kanë thënë se i jep qeverisë pushtet mbi TikTok. Sipas një skenari, platforma e mediave sociale e Musk X do të merrte kontrollin e TikTok US dhe do të drejtonte biznesin. Zyrtarët nuk kanë arritur ende një konsensus se si të procedohet me ketë situatë.
“Nuk mund të pritet që të komentojmë për trillimet e pastra”, tha një zëdhënës i TikTok, duke iu përgjigjur raportit. Mbetet e paqartë se sa ByteDance është në dijeni për diskutimet, apo për përfshirjen e Musk dhe TikTok, dhe nuk ka asnjë informacion nëse ByteDance, TikTok dhe Musk janë angazhuar në ndonjë bisedë në lidhje me një marrëveshje të mundshme.
TikTok ka thënë më parë se qeveria kineze “nuk ka asnjë ndikim në operacionet globale të ByteDance jashtë Kinës, duke përfshirë TikTok“. Javën e kaluar, gjykata supreme dukej e prirur të mbështeste një ligj që do të detyronte një shitje ose ndalimin e TikTok në SHBA deri më 19 janar, për shkak të shqetësimeve të sigurisë kombëtare në lidhje me Kinën.
Update (11:00) : Menjëherë pas publikimit të këtyre raportimeve, TikTok ka reaguar me një deklaratë duke i cilësuar ato si një “trillim”.
“Nuk mund të pritet që të komentojmë për trillime të tilla,” tha një zëdhënës i TikTok për BBC News. TikTok ka thënë vazhdimisht se nuk do të shesë operacionin e tij në SHBA.
