Ndërsa Netflix-i e filmat online po na dalin nga hundët, kinemaja e vërtetë zhvillohet nëpër sallat madhështore të festivaleve ndërkombëtarë, ku idetë e reja shtyjnë përpara konceptet e kohës e ku emocionet e ekranit të madh ndahen mes fatlumëve që e kanë gjetur një karrige bosh.
Ndaj lajmi i radhës na jep një mundësi që shumë prej nesh e kanë ëndërruar prej kohësh.
YouTube lajmëron festivalin digjital më të madh ndonjëherë, me filma e programe nga 20 festivalet më prestigjoze të planetit të cilat për shkak të pandemisë nuk mund të zhvillohen si tradicionalisht.
Berlin International Film Festival, Cannes Film Festival, Sundance Film Festival, Toronto International Film Festival, Tokyo International Film Festival, Tribeca Film Festival, Jerusalem Film Festival, Venice Film Festival dhe të tjera do të shfaqin filma me metrazh të gjatë e të shkurtër, dokumentarë, muzikë dhe diskutime nga yje e mendje të admiruara kudo, të gjitha vetëm pak klikime larg.
Vërtetë nuk do ketë tapet të kuq por hey, askush nuk të ndalon ta shtrosh një rrugicë të kuqe përpara televizorit masiv, ose jo, më mirë projektorit masiv dhe të ndjehesh të paktën një herë pjesë e galasë gjigande.
Festivali nën emrin WE ARE ONE Global Film Festival do të fillojë në 29 Maj dhe do të zgjasë deri në 7 Qershor dhe gjithçka do të jetë; falas! Po, nuk do të duhet të luftosh me viruse, pop up ads, apo torrent, mjafton të kesh kohë e dëshirë.
Dhe së fundmi nuk harrojmë pa përmendur edhe faktin që të gjitha donacionet që fo të mblidhen nga eventi do të shkojnë për World Health Organization COVID-19 Solidarity Response Fund.
Pritet të ketë reagim masiv pasi kurrë nuk është parë një event i të tilla përmasave.
Në ditët në vijim pritet të zbardhet edhe kalendari i plotë me data orare dhe detaje të tjera, dhe Geek Room do të jetë aty për të të informuar.
