Bashkimi Evropian po sjell ndryshime të rëndësishme për vizitorët jo-evropianë që hyjnë në Zonën Shengen. Më 12 tetor 2025 nis zyrtarisht Sistemi i Hyrje-Daljes (EES), ndërsa ETIAS (Sistemi Evropian i Informacionit dhe Autorizimit të Udhëtimit) është shtyrë për fundin e vitit 2026.
Sistemi i Hyrje-Daljes do të zëvendësojë vulat manuale në pasaporta me regjistrim dixhital të të dhënave biometrike (fotografi të fytyrës dhe shenja gishtash). Ai do të aplikohet për shtetasit e vendeve të treta që vizitojnë Shengenin deri në 90 ditë, si turistë apo udhëtarë biznesi nga vende si SHBA, Britania e Madhe, Kanadaja, Australia etj. Përjashtim bëjnë shtetasit irlandezë, poseduesit e lejeve të qëndrimit në BE apo vizave afatgjata. Fëmijët nën 12 vjeç nuk do të japin shenja gishtash, por do t’u bëhet fotografi.
Në praktikë, udhëtarët do të kalojnë nëpër kioska apo sportele ku do të skanojnë pasaportën dhe japin të dhënat biometrike. Herën e parë procesi mund të zgjasë më shumë, por të dhënat ruhen për tre vjet dhe udhëtimet e ardhshme do të jenë më të shpejta.
Sistemi do të zbatohet në 29 shtete, përfshirë të gjitha vendet e Shengenit dhe katër anëtare jo-BE (Norvegjia, Zvicra, Islanda, Lihtenshtajni). Zbatimi do të jetë gradual deri më 10 prill 2026. Përmes tij, autoritetet do të kontrollojnë automatikisht respektimin e rregullit 90-ditor dhe do të identifikojnë shkelësit.
Më tepër detaje rreth sistemeve EES dhe ETIAS dhe mënyrës se si këto sisteme do të ndikojnë tek udhëtimet e shtetasve shqiptarë, mund t’i gjeni këtu.
