Ish-presidenti i SHBA, Donald Trump, bëri disa deklarata të forta gjatë intervistës së tij me Greg Gutfeld në Fox News ditën e enjte.
Disa kohë më parë Trump ishte një përdorues i rregullt i rrjeteve sociale, sidomos Twitter dhe Facebook para se ai të dënohej nga këto platforma për shkak të deklaratave të tij.
“Ne kemi vendosur të padisim Twitter, Facebook dhe Google. Këta njerëz janë të sëmurë. Të gjithë personat që kanë dëshirë të na bashkohen janë të mirëpritur.” tha Trump.
Në momentin kur u përmend Mark Zuckerberg (7:00), Donald Trump reagoi menjëherë duke thënë se: “Ai vinte në Shtëpinë e Bardhë për të më puthur të ndenjurat. Dhe të shikosh tani se çfarë ata po bëjnë me mua dhe republikanët në Amerikë (po i bllokojnë deklaratat e tyre në Facebook) është çmenduri. Por kjo është mënyra se si bota funksionon.”
Trump u sigurua të bënte dhe disa batuta në lidhje me Twitter gjatë bisedës së tij me Gutfeld, duke u shprehur se ai ndihmoi në kthimin e platformës në një sukses. “Kur unë u regjistrova në Twitter 12 vite më parë, gjithçka kishte dështuar. Mirëpo më pas platforma u bë e suksesshme pasi shumë njerëz menduan se unë kisha një lidhje me të. Shumë njerëz menduan se Twitter ishte i keq për mua, por unë nuk jam dakord. Twitter është shndërruar në një platformë shumë të mërzitshme.” shtoi ai.
